جددي المكان.. تتجدد حياتك

إلى كل الراغبات في الزواج.. مثل ما ذكرت في موضوع سابق لي؛ العزوبية لها مميزاتها بس موضوعي هذا للي طفشوا من حياة العزوبية ويبون شي جديد بحياتهم


بخبركم عن طريقة غريبة لتعجيل الزواج بس والله مجربة من عدة بنات ونتيجتها سريعة...
الطريقة هي: تجديد غرفتك أو البيت كله بشكل عام.
والطريقة هذي مو للزواج وبس وإنما لجلب الحظ في كثير من الأمور في حياتنا والزواج جزء منها.
بضرب لكم أمثلة صارت في عايلتنا وانتو قرروا بعدها تجربون أو لا.

أختي الكبيرة تأخرت في الزواج بحكم انها كانت تدرس الطب فانشغلت في الدراسة وبعدها انشغلت بالعمل في مجالها الصعب فكانت ترفض فكرة الزواج لين تحس انها متهيأة نفسياً وتعودت على حياة العزوبية بس بعدها غيرت رايها تماماً وقبلت بواحد من العشرات اللي خطبوها.... بتقولون كيف؟
هي بعد ما غيرت غرفتها جذرياً (غيرت لون الجدران والستاير والفرش والأثاث وحتى الأرضية والتواليت حقها) انخطبت بعد تغييرها لغرفتها مباشرة ولقت نفسها موافقة على طول واذكر انها كانت مقهورة لأنها صرفت على غرفتها مبلغ وقدره وآخرتها تروح لبيت زوجها قبل لا تحلل قيمة الديكور الجديد!

بنت عمتي تأخرت في الزواج وغيرت غرفتها وبالصدفة تقدم لها الرجل المناسب وزواجها تم بسرعة!

أخت صديقتي غيرت غرفتها وتزوجت وهي اللي كانت مضربة عن الزواج حتى بعد ما وصل عمرها للثلاثين!

ومؤخراً غيرنا أثاث البيت وتزوج واحد من اخواني اللي كنا غاسلين يدنا منه انه يتزوج لأنه كان رافض فكرة الزواج من زمان ويقول انه مو قد المسئولية ويفضل حياة العزوبية مع ان عمره 31..... وبعد تجديد بيتنا فجأة قبل انه يتزوج وأعجبته البنت اللي اخترناها له وتيسر موضوعه وياها وصار كل شي بسرعة، ابتداء من الشوفة الشرعية إلى الملكة وانتهاءً بالزواج وحمل زوجته.. كله تم في أقل من سنة!

وما أنسى اللي صار لنا مع سواقنا،، مرض وعجزوا الأطباء عن علاج رجوله وقالوا يبي لها بتر ومستحيل يرجع يمشي ويسوق زي قبل، وضاقت صدورنا لأنه عندنا من 10 سنين وصار واحد من العايلة. المهم هو رفض ان الدكاترة يقصون رجوله هنا وسافر للعلاج بالأعشاب في الهند. وطول هناك ويأسنا من رجعته لأننا كل ما اتصلنا فيه قال للحين ما طبت وما زلت أتعالج.
المهم قعدنا أكثر من 6 شهور ننتظره. وبعدها نصحتنا واحدة من جماعتنا اننا نغير غرفته ونجددها بالكامل وننظفها زين.
واشتغلت الخدامة على الغرفة يوم كامل، طلعت الأثاث القديم وكل شي وبدت تنظف غرفته بشكل عميق، حتى الجدران مسحتها بالماي والصابون.
المهم بعدها صبغنا له الغرفة وجبنا له أثاث جديد وكلها فترة بسيطة إلا وهو متصل ويقول الحمدلله شفيت!
ومع ان حالته كانت ميؤوس منها بس سبحان الله رجع ورجوله متحسنة واجد ويسوق اوكيه وما فيه شي.

الزبدة وخلاصة الكلام يا بنوتات، الآنسات والمنفصلات والأرملات وكل العازبات اللي يرغبون في الزواج:
غيروا غرفكم وبإذن الله راح تتزوجون بأقرب وقت.
ما أدري كيف وايش العلاقة بين تجديد الغرفة أو البيت كله بالزواج بس هذي حقيقة مؤكدة ومجربة من عدة أشخاص مو خرافة وكلام فاضي.
أنا سألت واحدة كبيرة في السن عن هالشي وقالت هو فعلاً حقيقة.
وسمعت بعد انه مو ضروري تغيرون الأثاث والديكورات عشان تغيرون حياتكم، ممكن تغيير وضعية الأثاث أو نقله من مكان لآخر.
مثال: نقل السرير من زاوية لأخرى.

جربوا وادعوا لي اذا نجحت المهمة!

وإن شاء الله أشوف خبر زواجكم كلكم في هالمنتدى ويتقفل هالقسم اللي يجيب الاكتئاب